عيدُ الجيش

عيد الجيش

**********

بقلم جعفر ملا عبد المندلاوي

6كانون الثاني 2015

عيد الناس سفرة وعطر باريس == وتكشخ بالملابس بالمطارات

تفتر المدن وأحلى المصايف ==== وتختار الفنادق والبحيرات

هذا المنتجع ذيچ الشواطي ==== بالغابات لو تعبر محيطات

متروس الجواز شخوط واختام = ومرسومة على الوجنات ضحكات

بس جندينه عيّد بين الالغام === وعالساتر شمخ رافع الرايات

جندينه غيور وما شكه بيوم === من التعب من الجوع لو مات

غالي هالوطن بالروح يفديه == وسهله تصير يمه إن چان صعبات

يفوت على المنايا يحيّر الموت == ولا ينام الاسد عالضيم هيهات

لبس خاكي البطولة تحزم الدين == يتحدى الدواعش والحثالات

شهيد وللوطن رخصله دمه === لو بالنصر يرفعله علامات  

عيد الجيش من ينصر المظلوم = ويحمي بكل فخر ارض الحضارات

عيد الجيش وقفة ومرجلة وباس == مو تصريح خايب بالسياسات

عيد الجيش نار على الخوارج == وحمم تنزل عليهم بالحجابات

عيد الجيش شوكة بعين الارهاب = وغضب ينزل على أهل الخيانات

عيد الجيش عزّ ورفعة الراس = الك اطيب سلامي والتحيات

مَندلي .. بستان الورد

مندلي ... بستان الورد

============

بقلم : جعفر ملا عبد المندلاوي

3-1-2015م

12 ربيع الأول 1436هـ

مندلي بالطيب معروفة وصف == تلم أهلها بكل حنان بكل شغفْ

عالبلابل تغفه چانت من تنام == بالأزقة وعالشجر فوگ السعف

مندلي خير وعطاء وسُنبلات === ماي من يغزل جدايل بالجرف

هي بستان الورد فوّاح عطره == أحلى من كل المدن ما تنوصف

منـدلي حبّ وجمال وطيبّات == دمع عيني عليچ يجري وما نشف

عفيه صبرچ عالنوايب والمحن = جبل شامخ ما رجف منچ طرف

رادوا الأنذال تبچي ديرتي === وهي بسمة كل طفـل بيها إلتـحف

إحنه فوگ الطائفية وفد مصير = وإحنه إخوة وصعبة كلش نختلف

مندلاوي آني شيعي وسني آني = وآني دمي وياك من نفس الصنف

رغم أعوام المضت بينه عجاف === نبقه آني وياك إخوان وولف

هجرونه وما فرط عقد المحبه === وبقت لمتنه بمحنه بكل ظرف

آه من سهم الغدر لمن رمانه ==== فرّق الأحباب ؛ أبدا ما نِصف

وصبرت رغم المخاطر والظلم = شفت ياما حروب وإرهاب وعنف

عندي ماكو طائفية يالبعيد == آني أهوى حسين عنوان الشــرف

والولاية بدمي تجري وبالمهد == وي حليب أمي أشربتها وارتشف

وي اخوي السني نمشيها سوه == الكاظمية وكربله وأرض النجف

ومن يجي عاشور يرفع رايته == ويحضر المجلس وتعزية الطرف

بالمواكب حتى بالتطبير يحضر== من زمان ابعيد ، وبهذا انعرف

ويگول مثلك هم افاخر بالطبخ = ولو أضحي ؛ أبقه قاصر وأعترف

هذي قطرة إبحر جودك يا شهيد == ومنها كل الناس تروي وتغترف

آني أعزّي المصطفى بإبنه الحسين= إشلون حاله من سمع عنه وعرف

آني مَعْلَم للآخاء ؛ كردي ؛ عربي == تركماني ؛ وردة من أحلى صنف

آني شـيعي وآني سـني وكاكئي === ومن يجي نوروز فرحتنه ترف

هذي آني وهذا صوتي وأعلنه  == بكل وضوح وأنشره بكل الصحف

آني إبن أول حضارة ومدرسـة === وإسأل التاريخ تعرف هالوصف

نبقة وحدة موحدة وما نفترق ===  وغصبن عليهم على الحب نأتلف