هي الدنــيا ~

هاي الدنيا

===================================================ل

بقلمي جعفر ملا عبد المندلاوي

23ذي القعدة 1437ه :: 27 - 8 -2016 م

إحمد الله دومك وإرضه بالمقدور == محطات وسفر دنيانه عاينهن

طويلة السفر ة اخذ الزاد وياك == بعدها بعالم الارواح افتحهن

قبلك عاشت آلاف الامم واقوام = إفهم هالدروس وزين إحفظهن

طبعها الدنيا تغدر تخدع المغرور = = كلما طالت الايام تگطعهن

بالك تنخدع وتصدِّگ الأوهام == كل يوم اليمر مليان من عدهن

تظل دار  الحزن محفوفة بالآلام = تگطع بالنياط الوجع ماكلهن

ملمسها أنيق وغدر تنضح دوم = = وغيوم الفرح ما تمطر أدريهن

تزهي بعين هذا وتغري المسكين = والينظر بگلبه الخُدَع شايفهن

يلعب عالبشر  ويحّسّن الزلات = طبع ابليس يضحك من تزيدّهن 

يمد احبال غدره وينتظر تنصاد = ومن توگع يعوفك تنخنگ بيهن

هاي الدنيا تفتر والزمن دولاب = = ساعات الفرح بدموع تختمهن  

تعيش ايام عمرك ملتهي بدنياك = تالي تروح وحدك تندم بگدهن

يل تشكيلي همك تذكر الصدمات = عاين هالگلوب اشلون كسرتهن

من تحچيلي بالهّم لا تظن اهواي= آنه همومي ثگيله وصعبه أحسبهن

حط أحزان فوگ أحزان مرات == وأگلك شو بعد ما واصل الحدهن

شسولف يا صنف مو صارت أشكال = عني والوكت والعمر جامعهن

بيمن أبتدي وبياهي اگلك شوف == صارت بالضلوع اشلون أشلعهن

همّ الراح وخلّف بالگلب چويات == == لو همّ الزمن كل يوم زيّدهن

شنو طعم الوكت لمفارگ الأحباب = بانفاسي أختنگ بالهوا شهگتهن

باعمار الورد غطه الوجوه اتراب = وخابت كل أماني الچنت رايدهن

بعد وين الفرح وبيبانه تنسد دوم = وأبواب الكِدر  عالناس فاتحهن

اهل البيت هم أهل الشرف والجاه = بس شافو مصايب كُثر أصعبهن

اسوة للبشر وللصبر هم عنوان = بعدهم كل مصيبة العدنه اهونهن

بس عاشور وحده يشيّب الرضعان = بعد ياهي اگلك وانتهي بيا هِنّ

شو كلهن نوايب واحنه صرنه دروب=يمر بينه الوجع باحضانه شايلهن

حمداً يا آلهي من عبيدك دوم = = =  حمداً بارئ الأكوان خالقهن

حمدا دائما يا سيدي ونرجوك == لاهوال القيامة انريد نعبرهن

شموع الأربعين

شموع الأربعين

================================================

بقلمي جعفر ملا عبد المندلاوي

27ذي القعدة 1427ه :: 24-8-2016   

في أربعينية ولدي الفقيد عبدالله تغمده الله بواسع رحمته وأغدق عليه شآبيب لطفه وكرمه وجعله من شفعاء عليّ الأكبر يوم الورود بحق محمد وآل محمد ...

بربعينك جينه وشعلنه الشموع  == والله ردناها شموع الفرحتك

بدر تضوي چنت ما بين الشباب = ياحسافة اشلون طفوا شمعتك

من شعلناها بچت كلّ الشموع = وصارت الشمعة تواسي بموتتك

هذا عمك وولد عمك هل إجوك === ما دروا بـــين المگابر حنتك

كون شمعة فرح بالجنة تجيك == مثل قاسم تضوي بها بجنتك

يبني هاي المدرسة وصار الدوام = البس اهدومك قميص وسترتك

يبني صار الصبح گوم ولا تنام == وانتظر عالباب جية صحبتك

آه يا حسره احاچي بس خيال = وما أظن يطلعلي صوت بصورتك

آه ثاري الصبح يمك بس ظلام = والشمس هيهات توصل تربتك

زغير ابني وحشة ظلمات اللحود = وأدري صعبه وكلفه كلش وحدتك

يا فراشة جنة ما بين الورود == يا شَبه طير الحمام بشوفتك

سافرت وانت بعمر ورد الربيع = وآني عمري نذرته فدوة الجيتك

يا شباب الغاب منّي بالتراب = == == وآنه متأمل أهيّئ زفتك

گلبي يا يمظلوم دم يبچي عليك = ويجري بضلوعي دمع لمصيبتك

من اذكرك اشتهي يمك اموت == ما أريد أنسه وأصدّگ فرگتك

آني متأمل من الصورة جواب = واصفن گبالك شبيهه بصفنتك   

صدگ هاي الفرگه راوتني مرار = وصدگ شفت الموت آني بغيبتك

 من تناديني (فديتك) من تفوت = أنسى كل همومي چنت بضحكتك

ومن تنادي (يابه) أحس روحي تطير = جمرة تلسعني من اذكر لهفتك

 يبني ذيج الضحكة راحت من زمان = هسه كلّ البيت ظلمه بروحتك

انت وين تروح تزرع حب وطيب === ادب وأخلاق وبراءة بجبهتك

 أربعينك صار  وغافي بالتراب = = = أبد مو طبعك تنام بسفرتك

هاي صحبانك إجت تقرأ الدعاء = گوم استقبل ضيوف ابسمتك

والوفه احلى وفه بعد الممات = = = وصرت أميز بين أهلْ محبتك

حتى ملعب صار باسمك للشباب = ونصبوا بنص الملاعب رسمتك

هاي خوّة والنعم رمز الوفاء = = = والله وافوا هالشباب بـخوّتك 

البرزخ ..

البرزخ

=========================

بقلمي جعفر ملا عبد المندلاوي

24ذي القعدة 1437 :: 21-8-2016 م

مُهداة لأرواح وَلَدَيَّ الفقيدين (عبدالله ويقين) ...

عجيبة الدنيا من تضحكلك وتغريك = واتشبعك آماني وتخدعك بيها

تفرشلك فرح وتضملك الوجعات = سراب تشوف عينك ماي تجريها

تجيك بيوم تفرح وهي بس أوهام = والعاقل يفرزن ما يصد ليها

تخدعنه بغرور وتسـتر المضموم == وتجينه بــهادم اللذات تالــيها

أخبار الامم تحچيلك التفصيل = صـــاروا خبر كـان بأمـر  فانيها

يبن آدم توعّى هم يجيك الدور = = وتجيك السكرة باللّي چنت ناسيها

ودنياك الّي تتعب بيها ليل نهار == لا تنسى القيامة بيوم يطويها

وإعمل للحساب إتذكر الأهوال =هاي السفرة صعبةبجهد تســـريها

وتيقن جاك ملك الموت وعد الله == ويبدي بقبض روحك بامر باريها

ما يقبل شفاعة ولا الك تأجيل = من تيبس الورقة الشجرة تذريها

يالغافل تنبّه وخلي زادك خير = ظلمه الگبر  شوف اشلون تضويها

بعقلك لا بعينك انظر الدنياك == عقلك واعي يفهم كل مساعيها

واسمع بالگلب حتى الإذن خوّان == مو كلما تجيك احچايه تدنيها

وعاشر كل وفّي يصدگ وعد وياك = وباقي الناس احذر من تحاچيها

كل قول وفعل بكتابك مسجليه = وأبواب الظلم إبعدها إقصيها

فوت العالم الارواح بالاعمال = = واصلح برزخك بالتقوى إمليها

هذاالموت مثل الهوا يمشي وياك = حتى أنفاسك من اتنام يحصيها

ما يتقدم ويتأخر شما چــان = = = كل شي بقَدَر يمشــي وهو جاريها

بعد المن تكابر  مو شفت قارون = خسف بيه الارض سافلها عاليها

منكر لو نكير اهناك يتلگاك = = = = واشعندك إجابة اليوم اوعيها

من بعد الصلاة وصوم والأحكام = سنين العمر گلي اشلون گاضيها

هنيئا لليجاوب وبفصيح السان = وينطق بالشهادة اهناك يحچيها

وهنياله اليجاوب مطمئن الحال == آنه حيدر امامي العترة واليها

تجيك البشرى والتهنئة بالجنات = وتاخذ صك براءة وعليّ ماضيها

وهذي من عقايدنا وتظل بالروح = = حيدر  يحضر الاموات ياتيها

يبشّر كل موالي ويفرح بجنته === ويسوق المجرم وللنار  حاميها

أيام أربعين المرت بفرگاك = = يبني الغربة وحشة وصعبه أدريها

عين الليل ماتغفه تعاين ليك = = = تنظر طيف منك لو تسليها

اشعرها ثواني مو تگول ايام = اشحال سنين عمري بكل لياليها

من هم الزمان اخلصت يا رجواي =واحنه الضيم النه والك صافيها

دفنت إعزاز گلبي عام يتبع عام = = باعمار الورد بتراب اغطيها

عبدالله گضى تلگته اخته اهناك == أهلا نور عيني وكل معانيها

جاوبها بحنان وشوگ فدواتچ  === يختي اهنا آني اوياچ نحييها

ونبقى اهنا انه وياچ روح وروح == عفنا الضيم والدنيا ومآسيها

لكن يا حسافة الناس تنسى الموت = ملتهية بحياة الدنيا خليها

اهنا عاينت مثلچ عليّ الكرار  = = بشرني وعدني الشيعة يحميها

الله يعين كلّ مفجوع بوليده = = وشفيعه يكون آل النبيّ هاديها 

جوهرة النهر !

جوهرة الموج

===============================================

بقلمي جعفر ملا عبد علي المندلاوي

2 - 8 - 2016م  = الموافق 27 شوال 1437هـ

هذه الكلمات هي قصيدة رثاء لروح ولدي الحبيب وقرة عيني الفقيد عبدالله الذي وافاه الأجل غرقاً نهار الجمعة 10 شوال 1437هـ الموافق 15- 7 - 2016 وعمره 18 ربيعا ، فإنّا لله وإنّا اليه راجعون ولا حول ولا قوة الا بالله العليّ العظيم .

قد نزل الأمر فصدري ضعضع =نارٌ  تلظى في الحشا تَستوسِع

حل قضاء الله جلّت قدرتُه === حاشـا لأمرِ الله أن يُسـتدفَعُ

دار  تحـفٌّ بالبــلايـا كثــرة === هيـهات نرجو صــفوها المنقطـع

فالناس موتى والمنايا يقظة === في غمرة الآمال عنها تُخدعُ

فالدهر لا يعطي لراجٍ رغبة = كطالب الماء ، أيُغني اللعلعُ ؟

لا حيلة في الكرب الاّ خوضه = والصبر زادي في رضاه أطمع

تسري مع الايام ذي آجالنُا == والحكم ماضٍ ماله مُشَّفعُ

فقدٌ عزيزٌ ثم فقدٌ أوجعُ ==== رفقا بقلبٍ جوفه ينصدعُ

صبرٌ هناك وإصطبارٌ  هاهنا = قبرهما بين الشغاف مودعُ

بعد الزوال من نهار الجمعة =سهم المنايا أردى لبي الموجع

عزّ عليّ أن أراك جثة === حُف بك الموت وضاق الموسَعُ

وإن اطاق أخذك من ناظري = دون المحال من فؤادي تُنزع

أماتــك النهرُ الذي تيَّــاره ====  هَــاج فهاج مني ســـيل يهـــرعُ

فاضطرم الماء حَسَوداً عندها = فضمكَ كالدُرّ فيه تسطعُ

كيف طواكَ الماء إذ يَحيى به == كلّ الوجود للحياة مــنبع

والموج إذ لم يبك ابني غرقاً === فقد بكى قلبي دماً يندلعُ

واُســتلّ رُغماً من ذويه بغتةً == قبل الأوان وهو شابٌ يَفَعُ

يـاكوكبـاً مــا كان لو اُبقيت لي == بدراً يُضيء ليليَ والمهجعُ

كم سال فيك يا بُنيّ أدمعي == وفي الفؤاد حســرات تقبع

رحلت عن دنيا بثوبٍ طاهر = فإهنأ بدار ٍ لست فيها تُصْدَعُ

وجدٌ تنامى في الزفير حـــرّهُ == وخزٌ  يحزٌّ  في الشغاف يلسعٌ

يا نور قلبي ياضياء مقلتي === تبكي النياط من دمٍ تنقَطِعُ

والعين تبكي كيف لا وهي ترى=تحت التراب رمسهُ والمضجع

أبكي دماً لأني فيك فاقدٌ ==== خُلقٌ وآدابٌ وقلبٌ يخشعُ

قلبٌ كسيرٌ هَـدّهُ رزءٌ جللْ == وسط الحشا وجيبه يجعجعُ

يا ألطف الأرواح ضُمَّت في بدن = عند الآله روحه استودع

كنتُ به أُكنى فصرت كلما= كنّاني شخص فاض مني المدمع

كان رجائي بعد موتي ذاخرا == حتى دهاه ، فالرجا منقطع

إنّي يئست اذ نزلتَ للثرى == واغتالك كف الردى المتسرعُ

هلّا أتاني حين منك قد دنا === لكنه الموت الذي لا يشفعُ

إنّي لأشتاق لطيب حديثه === ونبرة من صوته هل اسمعُ؟

في كل ركن من زوايا دارنا == ضحكاته فيها وعطرٌ أضوعُ

لو كانت الدنيا جميعا عوضاً = ما كان لي عنه بذاكا مَقنَعُ

يا حبة في القلب يا روح المنى = مني ســـلاماً دائماً يستتبع

تحيةٌ تنساب من بين الحشا == وجدٌ لوادٍ أنت فيه ترتعُ

لئن مضى عبدُ فلِي محمدٌ === خلفٌ أرجيه اليه المفزعُ

قد يمحو القبر جمال وجهه = لكنه وسط الحنايا تُطبع

حتى اللقاء عند ربِ راحم = نرجو النجاة والجنان مجمع