بدر الطّف
=====================
قصيدة بحق القاسم بن الامام الحسن السبط عليهما السلام الشهيد بين يدي عمه الحسين يوم عاشوراء ... بقلمي
جعفر ملا عبد المندلاوي محرم
1440هـ :: ايلول 2018 م .
====================================
على طور :( آنه ام البنين
ودهري ذبني)
=====================================
هذا ابن الحسن بالطف بدرها == قاسم من برز يسّر عسرها
ينصر عمه الحسين = بيوم الغاضرية
**** 1 ****
شاف أبو الســجاد قاسم من طلع بين الخيام
شبه يوسف يضوي چنّة البدر في ليل التمام
نادى يبني ونظر عيني ورد على عمه السلام
تشابگوا نص الدرب = ودموعهم تجري وتصب
قاسم تجّهز للحرب = ومن الغمد سلّ الحسام
بيضّ وجهي يبني تحلّفه أمّه ==وتوضه بالحرب من فيض دمّه
وِصية المجتبى دِيَن = بيوم الغاضرية
**** 2 ****
صغير يبني وچنت أخاف من الهوى لو مر عليك
قطعة من گلبي وضناي وكل حياتي فدوه ليك
لو غبت روحي تغيب وما تردلي الا بيك
تاليها بالطف نفترگ == وبعبرته ظل مختنگ
ودعني وگلبي محترگ == ولعمه نادى
لبيك
طلع من الخيم شبه البدر نور == برز وجه يتشعشع چنّه بلور
ينصر عمه الحسين = بيوم الغاضرية
**** 3 ****
رمله يم خيمتها تبجي تدعي بس يسلم ابنها
دنيتي جسام كلها وكل حياتي وكل حســنها
ريحة الجنه من أشمك يبني لا تحرمني منها
يبني المنية هل اجت = كل العلايــم بينت
تخليني وحدي لورحت = وروحي تزّيد ونّها
حلم العرس يبني صاير أوهام == ابد ماحســبّت من غدر الايام
وتجري دمعة العين = بيوم الغاضرية
** 4 **
اغيابك هدملي حيلي عيوني راحت ضواها
وانت يا شمعة فؤادي ومنيتي وكل مبتغاها
ناصر المظلوم عمك مهجة الزهرة وضناها
ولحسين يرخص كل نفس = وبكربلا أعظم درس
راية عليّ ماتنتكس = ويه الدهر علاها
رافـگت العقــيلة واليتــامه == وابني اتحنه بدموم الكرامة
ومتربّ الخدين = بيوم الغاضرية
** 5 **
سافرت يبني وسفرتك هاي ما بيها رجوع
وظلت امك بالحلم تتأمل وتجري الدموع
مثلك الشبان تتحنه ويعلگون الشموع
من رحت يبني للحرب = = ظليت أتاني عالدرب
والدم على الوجنه يصب = وگلبي على ابني مفجوع
على وليدي سهرت سنين وسنين == وصية من الحسن قربان لحسين
وي أهله الميامين = بيوم الغاضرية
