ليلة الوداع
========
بقلم جعفر ملا عبد المندلاوي
8 محرم 1438هـ :: 10-10-2016م
ليلة وداع الاحباب ليلة رهيبة
حيرة ودموع الاطياب أعظم مصيبة
هالليلة عاشور= نلطم عالبدور
أعظم مصيبة == أعظم مصيبة
** 1 **
زينب تنادي عباس إگرب يخويه
هالليلة يحله الوداع آخر مسية
باچر مصيبة حسين والفاطمية
والجثة تصليها الشمس فوگ الوطية
الليلة ليلة فراگ بين الهواشم
وأشجى مصايب الكون سبي الفواطم
ناره لهيبه = أعظم مصيبه
** 2 **
عيون تقره بالذكر ذبلانه الجفون
والروح تلهب بالألم دم تجري العيون
نسوان تنعي بالخيم وأطفال يبچون
مدهوشة زينب حايرة والگلب محزون
معقوله تبقه بلا ولي هاي العقيلة
وكافلها نايم عالثره وش تشتكيله
وشيبه خضيبه = أعظم مصيبه
** 3 **
زينب تواسي الحسين وتزيد صبره
عباس لو هد بالحرب يگلبها حمره
وأنصارك انصار الوفه ربي مذخره
وبعالم الذر عاهدوا يوفون الزهره
وخيول جيش الناصبة گربت علينه
من كل دعّي وأهل البغي والباع دينه
أمة عجيبه = أعظم مصيبه
** 4 **
ونّة گلب زينب علت فجر
المصيبه
جمرة بگلبها لاهبه للصُمّ
تذيبه
عزيزه چانت بالأهل لمه مهيبه
شيّبها ثقل النايبه وتصبح غريبه
راح الها شمس ويا الگمر يودعوها
شافوها محنية ظهر من اعتنوها
ها يا غريبه = أعظم مصيبه
** 5 **
بعاشور صبحنا بهضم والهم يطيعه
وحسين مگطوع النحر شفت
الفجيعه
عباس راح المشرعة وچفّه گطيعه
وشبان هاشم عالثرى كلها صريعه
وانصار دين الله گضوا وفوا عهدهم
دون الحسين تكتلوا وبذلوا مهجهم
واهله سليبه = أعظم مصيبه
** 6 **
والنار شبت بالخيم شبت ضلوعي
واطفال هجت بالمعاره وكثر روعي
وجمع اليتامى والارامل زاد لوعي
ويا العليل اسانده وتجري دموعي
وللشام راحت للسبي بيت الرساله
والروس مرفوعه بعمد تنظر الحاله
نظرة كئيبه = اعظم مصيبه
=============
اللهم إجعل ثوابها لروح وَلَدَيَّ (عبدالله ويقين)
ليست هناك تعليقات:
إرسال تعليق